(ياطفلتي) الليل جمر.. والصبح شارع من مسد
والبحر يفتح نافذة للملح..لوسال فدمك
والغيم عانق صرختك دحرجلك الريح وسجد
صلى على فحم النخيل العارية وتجسدك
أرضً تخيط أحزانها وشعبً يفتش عن بلد
والنهر جغرفه الحزن شاعر يجف ويسألك
كم زهرةً تنبت على ملح الكفوف بلا عمد؟
وكم غصن يخدعه السراب أللي بزيفه بللك؟
وكم مرةً لازم نموت فـ هالتراب بلا عدد؟
وكم مرةً لازم نأسور كل جرح فمعصمك؟
(ياطفلتي) ضاق الصدى .. والصوت من صمتك صعد
هز النجوم..تساقطت..لم النجوم وطرزك
عقدً يسيل من الفجر (بغداد) وترابك جسد
وشالك قصيدة أورقت طين الحروف بدفترك
علقتلك شمس الحنين فـ راحتي ولحت البرد
لين البرد منك انتشى أغصان غيم وأذنك
شدي ظفايرك اوقفي وامشي لضا جمرك برد
شاخ الظلام ولانبت غير النهار براحتك
طيري حمامة من مطر لاجف ماك ولا ركد
وعودي سحابً اخضرً مافاض إلا منك لك
ياوردةً تمشي معي.. لوحارس احلامك رقد
هاتي يدينك ثم نامي واتركيني احملك
وانصبلك ارجوحة عطر في ظل تله من شهد
وأنصب مني لك ندى واقراء السلام لسوسنك
(بغداد) ماخان الزهر وعد الفراش ولاجحد
جيتك وفي عيني الطريق وفي جبيني رايتك
هزيت أجراس الفلك واسرجتلك ظهر الوعد
ومن كل حرف وكل بيتً شب فيني ذبتلك
وآمنت إني من هنا لهناك لو جيتك مدد
مهما كتبت / وما كتبت / وما كتبت اتعلمك
أولت تفسير السنين اللي على جلدك زبد
عريتها.. كانت( ظباء) ترشف أنامل سكرك
أحمد العريمي
