الخميس، 31 يناير 2013

مصر الحكاية



درويش..بعوده 
على الكباري يعزف لثورة
وفي والحواري
وفوسط خيمة في الميدان
والشيخ إمام في كل صوت
فعيون بهية
نيل بيجري فكل حي/

وأحمد فؤاد النجم حي
يكتب على جناح النضال
ويطيَّر المعنى حمام
يزرع على الإسفلت وردة
وسط ألاف الخيام/

يا مصر مالك فيك ايه؟

الثوري إبنك
صوتك / حبيبك / صرختك
يا أمنا حني عليه
واقف يدافع عن عيونك
خايف لا يرجعوا يسرقوها
دول لو يطولوا / يقتلوها
يا مصر قولي لثورتك خليكِ ماشية
وخليكِ صاحية
الثعالب همها أكل الأرانب والطيور
ووحش الخيانة بمية جنيه يقتله مصري

يا مصر فوقي فيكِ ايه؟

صلبوا جبينك في الظلام
نهشوا رموشك
قطعوا يدينك مرتين
شربوا دمك
ذوَّب خناجر دمهم
كل التراب/ أللي على عيش الرغيف
والعرق فيدين فقير كفيف شريف
أطهر وأشرف منهم

أللي فسد في مصر .. مصري
وأللي دافع عنها في الحرب مصري
وأللي يحكم مصر مصري
وأللي يحمي مصر مصري

وأللي قتل/ جنسيته مصري
وأللي هتف بإسمك يا مصر وصوبوه
جنسيته مصري
إعلامه مصري
أحزاب وساسة وشعب
مصري/

مالك يا مصر وفيكِ ايه؟

همَ الوحوش أللي تحوش
هربوا وسابوك فعذابهم بعدهم
متعسكرين من غير كروش
من برا برا يلسعوك بحقدهم

يلعن أبوهم وأمهم/

يا مصر عيشي للأبد
الثورة نور/
مش ضرب خرطوش وسلاح
الثور جنة من سلام
ترويها غيمة من كفاح
يحرسها أولادك يا مصر
والثورة تمشي فكل شارع لجل تبني ولجل تحمي
ولجل تعرف/
إنه فرق كبير مابين/
واحد بيمشي للحياة
وفلحضة يتصوب يموت
وبين مصري يقتل..
إبن مصري بمية جنيه/
مدفوعة من مصري لمصري
من برا برا يبعثوها
للثعالب والكلاب
يشربوا دمك بهية
ونقول حرام الدم واحد
كله مصري
وملاين بتدخل لجل تدفع لألف مصري
يقتلوا كم ألف مصري

مالك يا مصر وفيكِ ايه؟
إكنسي ليل البقر
خليكِ صاحية
عيزينك أنت بأي طرقة تعثري
خليكِ واعية

دا المصري عمرو ما يبقى غيره
إلا إللي خانك/

أما أللي ثار
وأنتفض لجلك عشان يقدر يحبك ألف مرة
ويعيش فقألبك..
ويموت فظلك ألف مرة
على شان يقوم من تربتك كم ألف وردة.
فألف قلب وقلب مصري.

دا المصري عمره ما يبقى غيره
إلا أللي خانك/

خايف من الثورة تعدي لشط فجرك بالحمام
والثورة مصري
والنيل كلامه شعبي مصري
والمصري عمرو ما يبقى غيره
المصري مصري. والسلام.

أحمد العريمي