إعربي/ فعل المضارع
ليش يذبل كل شارع!!
رغم انه الناس واجد
ولون هذا الليل ساطع
إعربي فعل المضارع
إعربي / خلف الستار
طاولة حبر وحوار
وخلف اضلاع النهار
انكسارات الحواري
وانتحار الحب
وأحلام الصغار
إعربي /
ما يعني إنا نعتلي للانحدار؟؟!!
إعربي
معنى الظلام
فجر يوم الانهزام
يوم مد الغرب نابه
عاصمة صارت حطام
ودّوت أصوات المدافع
طفل بين الحشد ضايع
صاح يمه
ولا لقا صدر"ن" يضمه
وقتها
ينكسر غصن السلام
ويتساقط في نهر( دجلة) حمام
وقتها بس وقتها
نقطف من الموت عزه
وينحني الموت احترام/
إعربي فكرة خطاب
صاغها .. صائب مصاب
لا سؤال / ولا جواب
صوت أعلى من خطيبه
والمصيبة
لا رقيب / ولا حسيب / ولا حساب
إعربي
كلمة قصيد
واحرقيها لا جديد
دام صوت الحق خنجر .. يقطع أنفاس الوريد
إعربي
معنى السكوت
نبض إحساس البيوت
والوجع والخوف فينا
كل مافقنا انتهينا
وكثر ما عشنا نموت
إعربي
كلمة احبك!!
وانثريها فوق حقدك
واسكنينا
لجل نحيا نسكنك
إيه نعرفك .. أنتِ الوطن
وإحنا عيالك
لو خطيتي نعذرك
بس إعربي معنى العزاء
وما سيعني مدح
وما يعني رثاء
واصرخي
واستصرخي
[لم تخلق الطرقات سيراً للوراء.]
أحمد العريمي
