كيف أوصلك؟
وما بيننا وعد"ن" ذبل
في كف هـ الليل البخيل
كيف أوصلك؟
الدنيا برد
والثواني ميتة
والشوق بي جرح"ن" يسيل
كيف أوصلك؟
سهل الطريق إني أجيك
لكن كل خوفي عليك
من التعصب
والقبيلة
ومن العيون اللي سرقت حلم المطر
واللي خنقت زهر العطر
واللي جرحت أشواقنا
واللي كبرت وتمردت فينا وذابت
في حنايانا خناجر ..يا قبلتي قبل السفر
كيف أوصلك؟
وما بيننا ريح ... ومطر
وصحرا أحرقت كل الشجر
من يوم كنا صغار وأذكر
نفسها ذيك العيون اللي خنقت صوت الفجر
ونفسها ذيك الوجوه اللي اكسرت فيني الأماني
وصادرت واستنزفت أحلى الأغاني.. والقصايد.. والصور
نفسها ذيك الأظافر اللي خمشت وجه القمر
كيف أوصلك؟
وأنتي بمنفى تسكني جرحك قصيدة
ماكتبها غير صمتك
والدموع اللي تناثر زهرها فـ بستان صدرك
كيف أوصلك؟
وقلبي بمنفى
مانزف غير الحروف .. ولاسكن غير الألم
قلب"ن" تشرد في شوارع تتربص الحب وتصادر حلم شاعر
باسم
عُرف المعتَقد
أو باسم
زيف الاعتقاد
ولامن عجزنا جهلنا
قمنا نواسي بعضنا
في جملةً
غنت بها كل البلاد
الله ما قد شاء راد
والنعم بالله العظيم
وأصرخ ألم
الله يا ظلم العباد
ياسيدة عمري وروحي
علميني كيف أحب
علميني
كيف تضحك شمس في حزن الغروب
كيف أكون الشاعر الأوحد
وأغني في زمان.. القهر
وأصوات التعصب
والتخشب..والقبائل .. والحروب
علميني
كيف أقدر لو ذكرتك
أحترق فيني وأذوب؟
علميني
كيف أسافر من أراضي
مـ لبست غير الكفن
كيف أهاجر من مداين
ما قرت غير الحزن
وصدقي لو قلتلك
كل العيون اللي تعبتنا
والوجوه اللي جحدتنا
والأظافر .. والغضب
هي نفسها
رغم التعب هي علمتني
إني غيرك ما أحب
أحمد العريمي
